ಮದುವೆ ಬಳಿಕ ಕೆಲಸಕ್ಕೆ ಮರಳಿದ ಅನುಶ್ರೀ: ಸಂಪ್ರದಾಯ ಪಾಲನೆಗೆ ಮೆಚ್ಚುಗೆಯ ಮಹಾಪೂರ

ಜನಪ್ರಿಯ ಆ್ಯಂಕರ್ ಹಾಗೂ ನಿರೂಪಕಿ ಅನುಶ್ರೀ, ಇತ್ತೀಚೆಗೆ ವಿವಾಹವಾದ ಬಳಿಕ ಸ್ವಲ್ಪ ದಿನಗಳ ವಿರಾಮ ಪಡೆದು ಈಗ ಮತ್ತೆ ತಮ್ಮ ಕೆಲಸಕ್ಕೆ ಮರಳಿದ್ದಾರೆ. ಆದರೆ, ಈ ಬಾರಿ ಅವರು ತಮಗೆ ವಿಶಿಷ್ಟ ಗುರುತು ತಂದುಕೊಟ್ಟ ಒಂದು ವಿಚಾರದಿಂದಲೇ ಅಭಿಮಾನಿಗಳ ಮೆಚ್ಚುಗೆಯ ಪಾತ್ರರಾಗಿದ್ದಾರೆ ಅದು ಮಾಂಗಲ್ಯ ಧರಿಸಿ ಕಾಣಿಸಿಕೊಂಡಿರುವುದು.

ಸಾಮಾನ್ಯವಾಗಿ, ಹಲವು ಸೆಲೆಬ್ರಿಟಿಗಳು ವಿವಾಹದ ನಂತರ ಶೋಗಳಲ್ಲಿ, ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಳ್ಳುವಾಗ ಮಾಂಗಲ್ಯ ಧರಿಸದೇ ಇರುವುದನ್ನು ನಾವು ನೋಡುತ್ತೇವೆ. ಕೆಲವರು ತಮ್ಮ ವಿವಾಹದ ವಿಷಯವನ್ನು ಕೂಡ ಹೊರಗೆ ಹೇಳಿಕೊಳ್ಳುವುದನ್ನು ತಪ್ಪಿಸುತ್ತಾರೆ. ಕಾರಣ, ತಮ್ಮ ಅಭಿಮಾನಿಗಳ ಪ್ರತಿಕ್ರಿಯೆ ಅಥವಾ ಬೇಡಿಕೆ ಕುಸಿಯಬಹುದು ಎಂಬ ಭಯ. ಆದರೆ, ಅನುಶ್ರೀ ಮಾತ್ರ ಈ ಕಲ್ಪನೆಗೆ ತಲೆಬಾಗದೆ, ತಮ್ಮ ಸಂಪ್ರದಾಯವನ್ನು ಹೆಮ್ಮೆಯಿಂದ ಪಾಲಿಸಿದ್ದಾರೆ.

ಅನುಶ್ರೀ ಅವರು ಜೀ ಕನ್ನಡದ ‘ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್’ ಹಾಗೂ ‘ಕಾಮಿಡಿ ಕಿಲಾಡಿಗಳು’ ಶೋಗಳ ಆಡಿಷನ್ ಸಂದರ್ಭ ಹಾಜರಾಗಿದ್ದಾಗ, ಅವರ ಕತ್ತಿನಲ್ಲಿ ಮಾಂಗಲ್ಯ ಸರ ಕಂಗೊಳಿಸುತ್ತಿರುವುದನ್ನು ಅಭಿಮಾನಿಗಳು ಗಮನಿಸಿದ್ದಾರೆ. ಈ ದೃಶ್ಯವನ್ನು ನೋಡಿ ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆಯ ಕಾಮೆಂಟ್‌ಗಳ ಮಹಾಪೂರವೇ ಹರಿದಿದೆ. “ಮಾಂಗಲ್ಯ ನೋಡಿ ತುಂಬಾ ಖುಷಿ ಆಯ್ತು”, “ನೀವು ಇನ್ನಷ್ಟು ಲಕ್ಷಣವಾಗಿ ಕಾಣಿಸುತ್ತಿದ್ದೀರಿ”, ಎಂದು ಅಭಿಮಾನಿಗಳು ಪ್ರಶಂಸಿಸಿದ್ದಾರೆ.

ಅನುಶ್ರೀ ಅವರು ತಮ್ಮ ಪತಿಯೊಂದಿಗೆ ವಿವಾಹ ಜೀವನವನ್ನು ಸಂತೋಷದಿಂದ ಪ್ರಾರಂಭಿಸಿದ ಬಳಿಕ, ಸ್ವಲ್ಪ ದಿನ ಕುಟುಂಬದ ಜೊತೆ ಸಮಯ ಕಳೆಯಲು ನಿರ್ಧರಿಸಿದ್ದರು. ಆದರೆ, ಈಗ ಅವರು ಮತ್ತೆ ತಮ್ಮ ಕರಿಯರ್ ಕಡೆ ತಿರುಗಿಕೊಂಡಿದ್ದಾರೆ. ‘ಸರಿಗಮಪ’ ಬಳಿಕ ಬ್ರೇಕ್ ತೆಗೆದುಕೊಂಡಿದ್ದ ಅನುಶ್ರೀ, ಈಗ ಹೊಸ ಶೋಗಳೊಂದಿಗೆ ಮರಳಿ ಬರಲು ಸಜ್ಜಾಗಿದ್ದಾರೆ.

ಜೀ ಕನ್ನಡದ ರಿಯಾಲಿಟಿ ಶೋಗಳಾದ ಡಿಕೆಡಿ ಮತ್ತು ಕಾಮಿಡಿ ಕಿಲಾಡಿಗಳುಗಾಗಿ ಆಡಿಷನ್‌ಗಳು ರಾಜ್ಯದ ವಿವಿಧ ಭಾಗಗಳಲ್ಲಿ ನಡೆಯುತ್ತಿವೆ. ಈ ಶೋಗಳ ಮೂಲಕ ಹೊಸ ಪ್ರತಿಭಾವಂತರಿಗೆ ತಮ್ಮ ಸಾಮರ್ಥ್ಯವನ್ನು ತೋರಿಸಲು ದೊಡ್ಡ ವೇದಿಕೆ ದೊರಕಲಿದೆ. ಅನುಶ್ರೀ ಅವರ ಈ ನಡೆ ಅನೇಕ ಯುವತಿ ಮತ್ತು ಮಹಿಳೆಯರಿಗೆ ಪ್ರೇರಣೆಯಾಗುವಂತದ್ದು. “ವೃತ್ತಿ ಜೀವನದಲ್ಲಿ ಯಶಸ್ಸು ಸಾಧಿಸುವುದಕ್ಕೂ, ವೈಯಕ್ತಿಕ ಜೀವನದ ಸಂಪ್ರದಾಯ ಪಾಲನೆಗೂ ಅಂತರವಿಲ್ಲ” ಎಂಬ ಸಂದೇಶವನ್ನು ಅವರು ತಮ್ಮ ನಡೆ ಮೂಲಕ ನೀಡಿದ್ದಾರೆ.

ಹೀಗಾಗಿ, ವಿವಾಹದ ಬಳಿಕವೂ ಸಂಪ್ರದಾಯ ಪಾಲಿಸಿಕೊಂಡು, ತಮ್ಮ ಕರಿಯರ್‌ನಲ್ಲಿ ಚುರುಕಾಗಿ ಮುಂದುವರಿಯುತ್ತಿರುವ ಅನುಶ್ರೀ ಅಭಿಮಾನಿಗಳ ಹೃದಯದಲ್ಲಿ ಮತ್ತಷ್ಟು ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ.